សេចក្តីប្រកាសព័ត៌មាន៖ វឌ្ឍនភាពការងារដោះមីនមនុស្សធម៌ក្នុងតំបន់អាទិភាពនៅព្រំដែនកម្ពុជា-ថៃ
នៅថ្ងៃទី៨ ខែវិច្ឆិកា ឆ្នាំ២០២៥ ក្រសួងការពារជាតិ បានចេញផ្សាយសេចក្តីប្រកាសព័ត៌មាន ដើម្បីជូនដំណឹងដល់សាធារណជនអំពីវឌ្ឍនភាពនៃការងារដោះមីនមនុស្សធម៌ នៅក្នុងតំបន់អាទិភាពនៅព្រំដែន កម្ពុជា និងថៃ។ យោងតាមសេចក្តីប្រកាសព័ត៌មាននេះ ភាគីកម្ពុជា និងថៃ បានឯកភាពបង្កើត ក្រុមការងារសម្របសម្រួលចម្រុះ កម្ពុជា-ថៃ (JCTF) ដើម្បីដឹកនាំប្រតិបត្តិការដោះមីនមនុស្សធម៌នៅតំបន់ព្រំដែន ។ ការដោះមីនត្រូវតែជាប្រតិបត្តិការមិនឯកតោភាគី ដោយអនុវត្តតាមនិយាមនីតិវិធីប្រតិបត្តិ (SOP) ដែលបានព្រមព្រៀងគ្នា ហើយសកម្មភាពនេះមិនត្រូវធ្វើឱ្យប៉ះពាល់ដល់ការកំណត់ព្រំដែនចុងក្រោយឡើយ ។ តំបន់ព្រំដែនសាកល្បងសម្រាប់ការដោះមីនគឺស្ថិតនៅ ឃុំអូបីជាន់ ស្រុកអូរជ្រៅ ខេត្តបន្ទាយមានជ័យ ប្រទេសកម្ពុជា ទល់មុខនឹង ឃុំណូនម៉ាកម៉ូន ស្រុកគោកស៊ូង ខេត្តស្រះកែវ ព្រះរាជាណាចក្រថៃ។ បន្ទាប់ពីការឈូសឆាយរួច តំបន់ទាំងនោះត្រូវតែ រក្សាស្ថានភាពដើម (status quo) ស្របតាម អនុស្សរណៈនៃការយោគយល់ឆ្នាំ២០០០ (MOU 2000)។
ក្រសួងការពារជាតិ
